WhatsAppGB waa nooc wax laga beddelay ee barnaamijka caanka ah ee WhatsApp, kaas oo bixiya astaamo dheeraad ah oo aan laga helin barnaamijka rasmiga ah. Inkastoo astaamahan dheeraadka ah ay soo jiitaan isticmaaleyaal badan, haddane adeegsiga WhatsAppGB waxaa la socda dhibaatooyin amni oo halis ah iyo khataro kale oo badan. Qormadaan, waxaan ku eegi doonaa dhibaatooyinka la xiriira isticmaalka WhatsApp GB iyo tusaalooyin dhab ah oo muujinaayo khataraha amni ay la kulmi karaan dadka joogtada u adeegsado.Dhibaatooyinka Amniga ee WhatsAppGB
1. Amni La'aan iyo Xatooyo Macluumaad
WhatsApp GB ma lahan ilaalinta amniga ee WhatsApp-ka rasmiga ah. Tani waxay ka dhigaysaa isticmaalayaasha inay halis ugu jiraan in xogtooda shakhsiyeed la xado ama loo isticmaalo si aan habboonayn. WhatsApp rasmiga ah wuxuu isticmaalaa nidaamka (end-to-end encryption) si loo ilaaliyo farriimaha, laakiin WhatsApp GB ma bixinayo dammaanad la mid ah.
2. Weeraro Malware iyo Spyware
Barnaamijyada aan sharciga ahayn ee wax laga baddelay waxay inta badan ka yimaadaan ilo aan la hubin, taasoo ka dhigaysa inay u nugul yihiin malware iyo spyware. Malware waa barnaamijyo wax u dhimi karo qalabkaaga, halka spyware uu yahay barnaamij ujeedkiisu yahay inuu si qarsoodi ah ula socdo isticmaalkaaga iyo xogtaada, sida bankiyadaada onlineka iyo fura sireedyadaada, taas oo dib lagaaga dhibaateyn karo.
3. Halis laguugu ganaaxi karo ama lagaaga xannibo karo.
WhatsApp GB waa barnaamij aan rasmi ahayn, isticmaalkiisana wuxuu ka hor imaan karaa shuruucda adeegga ee WhatsApp. Tani waxay sababi kartaa in xisaabtaada WhatsApp laga xannibo si joogto ah ama ku meel gaar ah.
Tusaalooyin sameys ah, oo muujinaya khataraha amni
Tusaale 1: Xatooyo macluumaad shakhsiyeed.
Faarax wuxuu isticmaali jiray WhatsApp GB sababtoo ah wuxuu jeclaa astaamaha dheeraadka ah sida awoodda uu ku beddeli karo muuqaalka farriimaha iyo inuu helo emojis cusub. Si kastaba ha ahaatee, dhowr bilood ka dib, wuxuu ogaaday in xisaabtiisa bangiga laga xaday. Kadib baaritaan dheer, waxaa soo baxday in WhatsApp GB uu ku jiray Spyware oo si qarsoodi ah uga soo xaday xogtiisa bankiga iyo macluumaad kale oo muhiim ah.
Tusaale 2: Weerarka Malware
Xaliimo waxay soo dejisatay WhatsApp GB si ay ugu raaxaysato adeegyada (features) dheeraadka ah, sida in statuska la tiro ay dib u fiirsan karto. Balse, wax yar ka dib markii ay bilowday isticmaalka, taleefankeeda ayaa bilaabay in uu si tartiib ah u shaqeeyo, culees daranna waa aay dareentay oo uu mararka qaar si toos ah u damo. Baaritaan ay sameysay kadib, waxaa soo baxday in taleefankeeda uu ku dhacay Malware kaas oo ka yimid WhatsAppGB, taasoo keentay in ay lumiso xog badan oo muhiim ah.
Tusaale 3: Xannibaadda Xisaabta.
Cabdi wuxuu muddo dheer isticmaalayay WhatsApp GB isagoo ku raaxaysanayay astaamaha cusub. Maalin maalmaha ka mid ah, wuxuu arkay in xisaabtiisa WhatsApp oo la xannibay. Markii uu la xiriiray qaybta adeegga macaamiisha ee WhatsApp, waxaa loo sheegay in lagu xannibay isticmaalka barnaamij aan rasmi ahayn, taasoo keentay inuu waayo dhammaan dadkii uu la xiriiri jiray iyo farriimihiisa muhiimka ah.
Talooyin
1. Isticmaal WhatsApp rasmiga: Si aad u hubiso amniga iyo asturnaanta farriimahaaga iyo xogtaada, waxaa kugula talinayaa inaad kaliya isticmaasho WhatsApp ka rasmiga ah ee laga soo dejiyo App Store ama Google Play Store.
2. Ka fogaaw barnaamijyada aan rasmiga ahayn: Barnaamijyada wax laga beddelay sida WhatsApp GB waxay halis weyn ku yihiin xogtaada taas oo lagugu dhibaateyn karo. Ka fogaaw isticmaalka barnaamijyadan si aad uga hortagto dhibaatooyinka amni.
3. Hubi xogtaada: Mar walbo hubi halka aad ka soo degsanayso barnaamijyada.
Ugu danbeyn adeegsiga WhatsApp GB wuxuu wataa khataro waaweyn oo amni iyo dhibaatooyin kale oo badan. Xogtaada shakhsiyeed ayaa halis ugu jirto in la xado, mobilkaaga ayaa la weerari karaa, sidoo kalena akoonkaaga WhatsApp ayaa la xannibi karaa. Tusaalooyinka aan kor xusay waxay muujinayaan khataraha dhabta ah ee ay la kulmi karaan dadka isticmaalo WhatsApp GB. Si guud waxaa si aad ah ugala talinayaa in laga fogaado adeegsiga barnaamijyada aan rasmiga ahayn.
WQ Cabdifataax Shureym